andmenning.com

Ég hef gert uppgötvun, eða öllu heldur fengið gríðarlega merkilega hugdettu. Hún kemur til af því að ég get ekki setið kyrr í skóla og hlustað, því ég sofna bara (ég þarf meira að segja að ganga um gólf þegar ég les bækur). Ég get hinsvegar hlustað ef ég er að hreyfa mig, það hef ég reynt með hljóðbækur í mp3 spilara á haupabretti í World Class og þar sem ég er að öllum líkindum ekkert voðalega einstakur meðal manna, má gera ráð fyrir að hjá töluvert mörgum einstaklingum sé þessu svipað háttað.

Lausnin við þessu er vitaskuld að henda stólum og borðum úr skólastofunum og kenna fólki á meðan það hjólar eða hleypur. Hjartað slær þá hraðar, blóðið er á meiri hreyfingu og heilinn fær fullt af súrefni og orku til að vinna úr upplýsingunum og á sama tíma verður fólk hraust. Í framtíðinni verða líkamsræktarstöðvar, heilsuræktarstöðvar og heilaræktarstöðvar (skólar) einn og sami hluturinn og mannkyninu mun fleygja fram sem aldrei fyrr.

Þetta er einnig mikill heimspekilegur sigur hjá mér, því Sókrates sagði:

Svo er að sjá, sem þorri manna gangi þess dulinn, að allir þeir, sem iðka heimspeki með réttum hætti, temja sér það eitt að deyja og vera dauðir.

Hér átti hann m.a. við þá erfiðleika sem steðja að hinum hugsandi manni vegna dauðlegs og ófullkomins líkamans. Líkaminn er alltaf að senda heilanum boð um allskyns ómerkilegt vesen sem truflar þungar hugleiðingar heimspekingsins. Kláði, hungur, hnerri, gredda, meiðsl, verkir og fleira eru fylgifiskar fangelsisins sem er líkaminn, en hugurinn þráir að hugsa hreinar og ómengaðar hugsanir, en burðast um með þetta kjötflykki og ergir sig á hrörnun sinni og stjórnleysi.

Svarið er vitaskuld unigymversitat (hámennta-sportskólinn). Þar er líkamanum haldið í góðu standi eins og heitri og smurðri bensínvél og skilboðum frá líkamanum haldið i lágmarki með því að beita honum á þann veg að hann endist sem lengst, geti sem mest, en trufli að sama skapi hina ómetanlegu hugsun sem minnst.

Þetta verður leynivopn mannkynsins um nokkur árhundruð, eða þangað til við færum hugsun okkar yfir í tölvur og gerviefni.

Ætli ég fái fyrir þetta fleiri fálkaorður en Ólafur heitinn biskup fékk?

-

Þess má geta að próf. Páll Skúlason stóð sig vel í tíma í dag, var brosmildur, einlægur og skemmtilegur.

Jæja, þá er skólinn hafinn og ég búinn að afreka það að sitja tvo tíma. Fyrst var það Inngangur að heimspeki sem Próf. Róbert H. Haraldsson kennir og síðan Heimspekileg forspjallsvísindi sem hinn rómaði Próf. Páll Skúlason kennir. Róbert H. þótti mér reyndar slá Páli við í viðkunnalegheitum og lifandi framkomu, en Páll hefur veturinn til að snúa því tafli við.

Bæði fög þykja mér hljóma spennandi af kynningartímanum að dæma og þótt inngangur að heimspeki sé nú líklega skemmtilegra fagið, þá þykir mér hugmyndafræðin á bakvið forspjallsvísindin mjög áhugaverð. Í því fagi er verið gera mönnum grein fyrir sjálfri hugmyndinni um menntun, til hvers hún er, sögu hennar og hvernig skipting fræðigreina er hugsuð og hvaða ólíku hugmyndir og hvatar liggja að baki skiptingunni. Þetta fag heyrist mér margir hatast út í, en mér sýnist það alveg getað verið mér sæmileg afþreying.

í tímanum sátu sumir og léku sér á Facebook og aðrir spjölluðu á MSN. Það þótti mér dálítið magnað, en um þau mál hefur Örvitinn, sem líka er sestur á skólabekk, skrifað sérstaka færslu. Sumir koma því víst jafnvel við að spila Eve online á meðan hlustað er á fyrirlestra.

En mér er víst ekki til setunnar boðið, heldur þarf að fara að lesa kaflann um Faídón í Síðustu dagar Sókratesar og síðan ritgerð eftir Pál Skúla.

Frétt á RÚV.is

Fjórðungur nektardansmeyja í Bretlandi er með háskólagráðu og meirihluti þeirra segist ánægður í starfi samkvæmt nýrri rannsókn sem var gerð af vísindamönnum við háskólann í Leeds. Þær fá að meðaltali rúmar fjörutíu þúsund krónur fyrir hverja vakt og eru með á bilinu fjögur til átta hundruð þúsund krónur í mánaðarlaun. Teela Sanders, sem var meðal vísindamanna sem tóku þátt í rannsókninni, segir að fyrir utan þann fjórðung nektardansmeyja sem hafi háskólagráður séu um tuttugu prósent til viðbótar í háskólanámi eins og stendur. Hún segir margar stúlkur leiðast út í starfið til að standa straum af námskostnaði en þær festist síðan í kynlífsiðnaðinum þegar þær hafi vanist himinháum tekjum og miklum frítíma. #

Nei, halló sko! Allar nektardansmeyjar eru niðurbrotnar sálir sem sjá ekki út úr augunum fyrir sorg yfir því að þurfa að bera á sér brjóstin, og síðan eru þær nánast skilyrðislaust vændiskonur á laun og oftar en ekki fórnarlömb mansals.

Þær Halla og Solla hljóta að vera að vinna í því þessa stundina að fletta ofan af þessum rannsóknaraðilum, þá skortir nefnilega alveg pólitíska rétthugsun!

Fljót, bönnum nekt!

Sum lögmál er undarlegri en önnur og duddulögmálið er klárlega ansi einkennilegt.

Duddulögmálið kemur við sögu þegar maður á 2 eða fleiri börn sem nota ólíkar stærðir af duddum (snuðum). Það virkar þannig að ef eitt barn grætur sáran og leitað er að duddu handa barninu, mun sá er leitar alltaf finna duddur hins barnsins fyrst í hlutfallinu 2/1 við hvað hann telur sig vita af mörgum duddum sem grátandi barnið á.

Tökum dæmi til frekari skýringar.

Matti fer að gráta og ég fer að leita að duddu. Ég veit að á neðri hæðinni eru tvær duddur sem hann á, ein í sófanum og ein í eldhúsinu. Fer ég þá að leita, en óhjákvæmilega mun ég ekki finna Matta duddur strax, heldur mun ég finna Kötlu duddur í sófanum og á gólfinu áður en ég finn Matta duddu á bakvið pullu. Fari ég inn í eldús fyrst mun ég sjá glitta í eina undir borði og teygja mig eftir henni, það mun síðan vitaskuld reynast vera Kötlu dudda og hin sem ég þá sé þá gluggakistunni líka, áður en ég finn Matta duddu á milli dúkkanna hennar Kötlu.

Seinna um daginn þarf ég síðan að finna duddu handa Kötlu sem hefur rekið sig eitthvað í og grætur taumlaust. Þá mun duddulögmálið alveg fara með mig, en þá held ég náttúrulega að ég viti um 4 Kötlu-duddur, en hvernig sem ég leita finn ég bara Matta duddur – sem þá eru skyndilega orðnar 8 á móti 4 og síðan kolla f kolli þangað til ég má eiga von á að finna 64 Matta-duddur á móti hverjum 32 Kötlu, eða öfugt.

Á nóttinni virðist lögmálið núllstilla sig og að morgni finnur maður aftur bara eina til tvær duddur áður en tvöföldunarbrjálæðið fer af stað.

Ég hef sent Háskóla Íslands erindi um málið og hafa 4 stærðfræðingar, 2 eðlisfræðingar og einn guðfræðingur óskað eftir því að fá að fjalla um málið í masters- og doktorsritgerðum sínum. Ég hugsa að ég hleypi annaðhvort eðlisfræðingunum eða stærðrfræðingunum í það, því ég á jú bara von á einnar línu skýrslu frá guðfræðingnum: Ég álykta að Guð hafi gert það.

Ég horfði í gær á dálítið magnaða heimildamynd um Móður Teresu, sem Vantrú vísar á. Krabbameinsgarpurinn Christopher Hitchens er þar að mála aðra mynd af henni heldur en fjölmiðlar heims hafa gert síðustu áratugi og er þessi mynd ólíkt minna björt og falleg, en því miður líklega sannleikanum samkvæm, að því er mér sýnist.

Kerla boðaði einfaldlega uppgjafartrú sem hentaði kirkjunni og valdhöfum og var þannig gangandi markaðs- og áróðurstæki fyrir hina ónýtu kaþólsku heimssýn. En kraftaverkafýsnin og trúarviljinn láta ekki að sér hæða, fólk vill svona hetjur, hvort sem þær raunverulega gera gagn eða ógagn.

-

Teddington lávarður fór í skólann í morgun. Fyrsti skóladagurinn! Það verður gaman að heyra í honum seinnipartinn um hvernig hann upplifði þetta allt saman og hvort hann þagði nógu lengi til að einhver annar en hann fengi sagt eitthvað. Hann var ekkert stressaður og kvaddi mömmu sína bara hinn rólegasti þegar hún skildi við hann í Rimaskólanum. Dásamlegur garmur, mikið voðalega er hægt að þykja vænt um börnin sín.

-

Ég skrifaði grein fyrir Vantrú sem birtist í dag. Hún fjallar um það þegar menn kalla trú mannlegt eðli og segja að það komi bara eitthvað annað í stað trúarbragða. En það er nú heila málið, að við nöldrararnir viljum einmitt eitthvað annað í stað trúarbragða.

-

5 dagar í að ég setjist á skólabekk! Ætli maður muni nokkuð hafa tíma fyrir þetta blogg eftir það? Þetta verður spennandi.

Katla Kristín ákvað í gærkvöldi að athuga hvort hún gæti rifið tröppurnar heima af veggnum með höfðinu. Hún tók sem sagt gott tilhlaup og stangaði tröppurnar af slíku afli að húsið nötraði allt og skalf. Augnabliki síðar var það neðrivör litlu stelpunnar sem nötraði og skalf. Ég kældi kúluna á enninu með blautum þvottapoka og klaka og kúlan varð merkilega lítil miðað við átökin. Vonandi er hún nú hætt að gera tilraunir með að ryðja hlutum úr vegi með höfðinu.

-

Haukur er búinn að  festa sér salinn í Hamraskóla til að spila í körfubolta í vetur. Það lítur út fyrir að eftirfarandi hraustmenni muni mæta þar á hverju þriðjudagskveldi:

Full time brjálæðingar
Haukur
Ég
Arnar
Einn enn tengdur Hauki
Baldur
Helgi
Stebbi

Varamenn
Stefán Svan? -  eða full time, Stefán?
Siggeir
Pétur
Óli B
Örn?

Hefjast leikar fyrsta þriðjudaginn í sept. harðsperrur og íþróttameiðsl, hér kem ég!

Hér er vídeó til að komast í fíling!

-

Síðan er World Class að opna í Kringlunni eftir helgi. Nú fer ég að yngja mig upp, þetta slen er ekki hægt lengur!

-

Við Pálína horfðum á World’s Greatest Dad um daginn með hinum frekar ónýta Robin Williams í aðalhlutverki. Myndin kom mér skemmtilega á óvart; var þunglyndisleg, undarleg og dálítið vond við áhorfandann, en einmitt þannig vil ég hafa kvikmyndir. Eftirminnilegri en margt sem ég hef séð síðustu ár.

www.stimator.com er vefur sem reynir að meta verðmæti vefslóða.

Vefurinn segir um Microsoft .com:

microsoft.com is worth $131,866,050. This makes microsoft.com the 3 most valuable site on Stimator.com.

Um mbl.is segir hann:

mbl.is is worth $44. This makes mbl.is the 7,912,893 most valuable site on Stimator.com.

En takið eftir því hvað hann segir um þetta blogg mitt:

andmenning.com is worth $138. This makes andmenning.com the 2,522,952 most valuable site on Stimator.com.

Bloggið mitt er rúmlega þrisvar sinnum verðmætara en mbl.is!

Við Teddi vorum rétt í þessu að klára að horfa saman á teiknimynd um Ástrík og Steinrík. Hann sér náttúrulega ekki myndina, heldur hlustar bara, svo ég mátti hafa mig allan við að lýsa aðstæðum fyrir honum og tengja saman hljóðskeiðin svo hann skildi.

Mér tókst ekki ver upp en svo, að hann hefur nú fullan skilning á dásemdum þess að drekka töfraseyði og lumbra á Rómverjum. Það virðist strákum undantekningalítið þykja mjög gott sport, þó ekki sé nú beinlínis verið að upphefja gullnu regluna í þessum boðskap og uppeldisgildið því kannski takmarkað.

Pálína segir að þetta hljóti að vera strákadæmi, aldrei hafi hún nennt að horfa á eða lesa um Ástrík og Steinrík. Stelpum dreymir sem sagt ekki um að vera ofurmenni sem lúskrað geta á heilu herdeildunum af brynklæddum Rómverjum. Merkilegt!